আউরি মাত

।। সুপ্রদীপ দত্তরায়।।

(C)Image:ছবি

দূর ছাই ,কিচ্ছু মাথাত আর না 

ছন্দ,কথা --- আমার মাথা

ভাঙ্গি লাও, তেও হিলে না ।

যেতাউ  ভাবি, আউরি লাগে , 

থুরা বহুত লেখলে, চাক্কা ভাঙ্গি পরে 

কিলা জ্বালা, বুঝান যাইতো না ।

ওউ যে হউ বাড়ির পুয়াতি বেটি

দেখরাই নানি কিলা চটচটায়, 

আমারও ঠিক ওলা অবস্থা 

ওউ বুঝি বাইরই যার,আবার নায়।

কিরমির বেরাম হইলে যেলা

গলায় মাথায় লিকলিকায়

আমারো ভিতরে ঠিক ওলা ছনছনি

বমি হইতো হইতো করে,কিন্তু নায়।

যদি কিরিমি মাথাত উঠি যায়

তাইলে একটু খেয়াল রাখিও রে বা

আমারে কিন্তু তেজপুরো দিও না 

রাঁচি পাঠাইও । তেজপুরোর যে তাল 

যারে কয় এক্কেবারে তাল বেতাল

আমার লেকান মাথার ঠিক নাই 

বাঙালি দেখলেউ উঠে বাই ,

কুনু বিচার নাই, বুদ্ধি নাই

অখানোউ শুরু অখানোই শেষ 

হয় ক্যাম্পে পাঠাও নাই বাংলাদেশ ।

আমারে বা তেজপুরো দিও না প্লিজ ।